O alcalde de Barbadás denuncia ameazas tras a aparición de varios papeis intimidatorios

O alcalde de Barbadás (Ourense), Xosé Carlos Valcárcel, presentou esta mañá unha denuncia na Comandancia da Garda Civil de Ourense tras a aparición de varios papeis que poderían constituír un delito de ameazas.

Os documentos, atopados inicialmente o sábado nos parabrisas de varios vehículos na Valenzá, mostraban unha caricatura do rexedor con texto intimidatorio: "ALCALDE ARREGLA EL CONCELLO 1º AVISO". Ademais, outros catro papeis idénticos apareceron esta mañá na gardería municipal, aparentemente introducidos o venres por unha ventá aberta.

Valcárcel asegura non desconfiar de ninguén en particular, mentres a Garda Civil iniciou unha investigación para identificar o autor ou autores do suceso.